Ana Lorenzo revisará a ordenanza de prezos da escola infantil para “axustala á realidade”

30.08.09 @ 09:31:13. Archivado en Vilagarcía

A escola infantil mantén os prezos clásicos despois de que fose denegada en xullo a reforma de Lorenzo.
A concelleira de Servizos Sociais, Ana Lorenzo, asegura que está a preparar unha nova revisión dos prezos públicos que rexen na escola infantil municipal. Despois de que a súa anterior iniciativa fracasara no Pleno de maio, onde se atopou co decisivo “non” de PP e EU, a nacionalista recoñece que nesta ocasión “o máis importante e acabar cunhas bases que non se axusta á realidade”, o que redundaría, entende, “nun beneficio económico directo para os usuarios da escola”. Agora trátase de poder buscar a fórmula para implantar dita reforma. A que baralla principalmente Lorenzo é a do Pleno de ordenanzas e impostos municipais, que é onde se fixan este tipo de iniciativas. Unha vez aprobados, os novos prezos entrarían en vigor de inmediato.

A concelleira de Servizos Sociais mantén a súa idea de revisar os prezos da escola infantil municipal, despois de que a súa proposta fóra rexeitada no Pleno de maio co voto en contra dos partidos da oposición. A medida impulsada por Ana Lorenzo serviría para axustar as tasas deste centro de educación infantil “á realidade”, pois a nacionalista entende que algúns puntos quedaron obsoletos, mentres que outros non están ven reflexados na normativa.
Este sería o exemplo do que acontece a día de hoxe con aqueles pais que leven aos seus fillos só en horario de tarde. Actualmente pagan a matrícula íntegra, cando a concelleira quere que se aboe só o correspondente ás horas que os rapaces pasan no centro público.

“Temos que buscar a fórmula para volver a presentar a proposta. Non sei se podería ir a Pleno de novo, polo que quizáis sexa mellor agardar ao das ordenanzas municipais”, comenta a concelleira que, non obstante, fai especial énfase na necesidade de que nesta ocasión o seu plan non sexa rexeitado de novo. “Antes de nada quero ter a seguridade de que se vai a apoiar, senón non vale a pena presentalo”.

Con isto, Ana Lorenzo abre a vía do diálogo cos partidos da oposición, e en especial con Esquerda Unida, que se opuxo á anterior proposta por considerar que se quedaba curta de miras.

Se recentemente o voceiro de EU, Juan Fajardo aseguraba que a nacionalista non quería negociar dito plan, agora ela contesta que “dende que se celebrou aquel Pleno o señor Fajardo non se puxo en contacto comigo en ningún momento para falar deste tema, pero estou sempre á súa disposición. De feito, os nosos despachos municipais están porta con porta”, asegura.

A concelleira de Servizos Sociais critica a postura de EU ao considerar que non se pode aplicar na realidade e di que “o ideal sería que a escola infantil fose de balde para os pais, pero existen trabas orzamentarias e normativas que impiden aplicar tal proposta”. Por iso, insiste en que “Fajardo deixe de falar de cara á galería, fóra da realidade, para quedar ben”. Ana Lorenzo afirma que “quero saber cales son as propostas de Esquerda Unida”, pois lembra que “a nosa xa foi presentada e levou moito traballo co equipo que dirixe o centro e a empresa que xestiona o servizo”.

Lorenzo indica que a normativa actual data de 1994, cando a concesionaria comezou a súa actividade e que o Concello “debe ter un control maior sobre a xestión para garantir que funcione ben”, en referencia aos cambios que desexa introducir, que “non suporían desequilibro económico algún para a empresa e respectan o prego de condicións actuais”.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.