Lorenzo e Abuín solicitan un encontro con Tourís para falar das polémicas voladuras

10.07.09 @ 11:34:38. Archivado en Vilagarcía

O poboado xitano podería estar en risco debido ás voladuras.
As concelleiras de Promoción Económica e de Servizos Sociais, as nacionalistas Rosa Abuín e Ana Lorenzo, visitaron á tarde de onte as zonas da parroquia de Cornazo afectadas polas explosións realizadas con motivo das obras da estrada de acceso ao Porto. Ante a situación creada e os sucesos dos últimos días, as concelleiras enviaron onte unha carta ao delegado territorial da Xunta no norte de Pontevedra, José Manuel Cores Tourís, a fin de manter unha reunión na que se analizaría se a empresa adxudicataria das obras está a cumprir coa normativa.

Na súa visita a Cornazo, Rosa Abuín e Ana Lorenzo detivéronse especialmente no poboado xitano, onde puideron comprobar as consecuencias das voladuras e o perigo que, segundo elas, as mesmas obras causan para a estabilidade das vivendas, a maioría delas de baixa calidade construtiva. Abuín e Lorenzo sospeitan que a empresa non está a cumprir coas normas que xa no seu día se lle impuxeran logo dunha visita dun inspector de Industria.

As concelleiras de Promoción Económica e de Servizos Sociais entenden, como o goberno local, que a circunvalación Sur, que dá ademais acceso ao Porto, é, destacan, unha obra fundamental para o desenvolvemento de Vilagarcía. Non obstante, advirten que iso “non é incompatible coa necesidade de cumprir coas normas e, sobre todo, coa obriga de respectar persoas e propiedades”, algo no que incidirán perante o delegado.

Cabe lembrar que esta mesma semana, o pasado luns, tivo lugar nesta obra responsabilidade do Ministerio de Fomento, un sinistro mortal que costou a vida a un empregado da empresa adxudicataria das obras, Expano.

Os feitos sucederon arredor da unha do medio día. Segundo varios testigos, unha voladura teoricamente controlada, provocu o desprendemento dunha rocha de gran tamaño que impactou contra a cabeza do empregado de Expano que se encargaba dunha das máquinas da obra. Este violento choque prodúxolle a morte case de inmediato.

Posteriormente, o sindicato CCOO saíu ao paso do sucedido e asegurou que se personaría como acusación particular se finalmente a investigación de Inspección de Traballo resolve que existiu neglixencia no eido da seguridade laboral por parte da empresa encargada dos traballos.

2 comentarios • Trackback (0)

Comentarios:

Medo me dan estas dúas. O pobre de Castro xa pinta menos neste BNG que Quintana no goberno da Xunta.

Agora, a hora de defender aos traballadores, vaille sair unha competencia clara a Fajardo, menos mal que os sindicatos comezan a facerse co control do goberno de Vilagarcía.

O que nos agarda!!!

Comentario por Serxio Ramón 10.07.09 @ 19:13