Santa Elena e Monteverde

16.12.07 @ 23:23:33. Archivado en textos creativos

Ao día seguinte viaxamos coa intención de visitar as reservas de Santa Elena e Monteverde, ambas son bosques nubosos bastante similares, diferenciándose no feito de que o segundo ten claros. Para chegar a Monteverde hai que bordear o lago Arenal ou atravesalo en barca. A paisaxe volve a mudar e percibimos montañas mesturadas con pastos, cabalos e gando vacún fundamentalmente. A estrada é bastante mala e en todos os pequenos núcleos de poboación polos que pasamos había algún tipo de igrexa, entre as que estaban o tabernáculo de adoración, alabanza vida nueva, templo cristiano asambleas de dios, iglesia de dios petencostal... Ao chegarmos comezou a chover e todas as tardes dos días nos que estivemos houbo fortes treboadas. Pola televisión enterámonos que o furacán Denís estaba asolando Cuba e Haití. Era curioso observar nun programa ao camarada Fidel falando co meteorólogo, de cómo sería o tempo nos vindeiros días e as medidas a adoptar para superar a circunstancia. Os noticiarios son do máis ilustrador, produto de cómo a noticia é a manifestación do punto de vista de quen detenta o seu poder, construíndo ao seu xeito a parte do mundo que se quere amosar, incluso cando se fala de chuvia ou de sol. Polo demais, as mañás eran nidias e espléndidas e nas tardes a néboa comezaba a baixar das montañas e en menos de dez minutos envolvían a contorna cunha pinga de misterio. A xente do lugar di que nunca saben qué tempo vai facer porque xusto na zona se xuntan as correntes atlánticas e pacíficas o que provoca que o clima sexa impredecible, pero o máis normal é que sempre chova moito.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.