Ascensión a Cerro Chato

21.10.07 @ 23:00:30. Archivado en textos creativos

Pica coméntanos que estamos en época de celebracións e que na vila de Tanque van comezar as festas cívicas, entre as actividades a desenvolver están as carreiras de montainbike, as bicicletas farán a rota do conquistador, que vai do Pacífico cara ao Atlántico; carreiras de cabalos e corridas de touros das que nos comenta que non se maltrata ao animal pero que manteñen o seu toque machista: os homes montan e tourean ao rumiante sen mancalo, en plan cowboy coa finalidade de que toda a colectividade valore a valentía dos que ousan a difícil tarefa da monta.
A ascensión ao Cerro Chato resúltanos dura. Saímos dende o hotel Arenal Observatorio, de estensos e coidados xardíns para irmos adentrarnos no bosque. É curioso e sorprendente o luxo, non só deste recinto senón tamén de diversas instalacións que agroman perto da estrada e con impresionantes vistas cara ao volcán; estas zonas están catalogadas segundo as posibilidades de risco ante unha erupción. As áreas de influenza da montaña de lume están baremadas, polas medicións vulcanolóxicas, do un ao cinco, sendo as do grupo un as máis perigosas. Moitos hoteis están nesta situación. Claro que hai normas ao respecto coas prohibicións de construir. ¿Mais que é unha lei cando os intereses económicos priman por riba da seguridade? Os turistas queremos sempre estar nos mellores sitios, ter as vistas máis impresionantes, permitirnos os luxos que quizais durante o resto do ano non temos, levar as vivenzas e as imaxes inesquecibles no noso interior, iso si, a golpe de talonario, tampouco, ata que nolo din, somos conscientes do posible risco que se corre. Claro que tería que haber unha erupción e os estudos vulcanolóxicos están a diario coas medidas, pero realmente, ¿quen pode predecir con seguridade que a montaña de lume vai estoupar? Os empresarios buscan o maior beneficio, aproveitar o tirón do turismo e que dure mentres dure, se de socato o volcán erupciona e todo queda estragado pola lava, con anterioridade xa lle sacaron o rendemento. E así están as cousas: construccións de luxo para turistas en áreas de risco, nos arredores dun volcán activo con quen a xente do lugar aprendeu a convivir e a esquecer o que é o medo. Vida e morte outra vez. Ningunha compañía aseguradora asume tal risco nas súas pólizas.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.