Endovite

03.10.07 @ 22:48:35. Archivado en textos creativos

Fixemos unha camiñata noturna en Endovite, lugar famoso pola cantidade de serpes que alí habitan, no percorrido acompañounos Gabriel, un guía docto en réptiles. Ao comezo non disfrutamos porque fomos conscientes dos perigos que entraña un bosque chuvioso tropical húmido de tipo medio, nunha noite de treboada onde os relampos, ás veces, conseguían penetrar entre as árbores e iluminar durante uns intres a contorna. Déronos unhas botas de goma que chegaban ata os xeonllos para evitar, no caso dun posible accidente cunha serpe, trabaduras. O guía relataba as características e trazos de cada un dos animais que atopabamos e confirmounos que a picadura da oropel bocaracá que observáramos en Manzanillo é letal nun máximo de sete horas sen asistencia hospitalaria. Por sorte esa noite non nos atopamos con serpes, aínda que si cun sapo que comezou a emanar veleno polas glándulas ao sentirse en perigo, vermes que revían cianuro a través dos lombos, eirugas, tarántulas, escorpións, mantillas entre as pólas das árbores, formigas polas enormes autoestradas que elas mesmas teceron no tempo, termes, caruncho, morcegos, unha ra follaxe que xunto coa ra touro é a única que pon os seus ovos en terra e non pasan pola fase das culleriñas, senón que saen convertidas xa en ras. E a mañá seguinte .... ¡Uf!, Zapatero está no televisor, atentado en Londres, onte foi África quen se desangraba na pantalla, por mor da corrupción, da fame, das enfermidades, sobre todo da sida, ¿cara a onde imos? O metro, os autobuses, os medios de comunicación tomados polo terror e a morte, África tamén tomada polo terror e a morte. O grupo dos países máis desenvolvidos reunidos para falar do gran tema dese descoñecido continente. Pero as rúas de Londres foron tomadas pola dor e nós aquí, no medio de todos e de ningún mundo posible, tranquilos porque na noite anterior non nos trabou ningunha clase de serpe.
(a viaxe fixémola en xullo de 2005).

Comentarios:

Se muestran únicamente los últimos 40 comentarios de cada post.

Los comentarios para este post están cerrados.