Últimos intres en Puerto Viejo

25.08.07 @ 21:25:42. Archivado en textos creativos

O banco de Puerto Viejo é pequeno, con aire acondicionado. No exterior ten un caixeiro automático e na porta de entrada un garda de seguridade que tamén fai funcións de porteiro. Arrimado á parede hai un ordenador de uso público con acceso a internet, enfronte, acristaladas, dúas persoas atendendo na caixa e outra, tamén detrás dun cristal, para os asuntos de mostrador. Agardamos ás nove da mañá, a hora de apertura, a xente chegaba e ía colocándose en fileira. Chamounos a atención dous anciáns, tales eran as diferenzas que nun principio non consideramos que fosen parella, comezando polo aspecto físico, a muller bastante composta, o home máis sinxelo, ela tratábao con certa distancia pero el insistía no seu querer dicíndolle aquilo de usted sabe que yo la amo y la respeto porqué me trata así pues con tal desprecio; pero ela nada, facéndose a dura, ían ao banco quizais a axustar contas, mentres que nós iamos cambiar dólares en colones, xa que ao pagar no hotel rexeitáronos un billete de cen por mor dos avisos a nivel nacional da falsificación de dólares da serie CB, B2, aconsellando aos receptores rexeitar a moeda ante unha presunta fraude. Alí non tivemos problemas, como quen di, nin miraron para o billete. Esa foi a derradeira incidencia en Puerto Viejo antes de subir ao autobús que nos trasladaría a Fortuna. O condutor vivía en Manzanillo con quen falamos dos Sanfermíns, conversa que logo derivou nas festas con animais en Costa Rica, informándonos que aquí os touros teñen un tratamento máis digno do que lles acontece nas corridas, xa que non se fere ao animal e hai unha especie de simbiose entre toureo e a arte da monta, tal e como pasa nos rodeos americanos. Outra das actividades prohibidas, cousa que non impide que ás veces se practique, son as pelexas de galos, que sí estan regulamentadas en Panamá. É curioso o modo de ser de cada estado, coas súas normas específicas para determinar os comportamentos colectivos: segundo nos comentou o panameño Roberto, en Costa Rica o consumo de marihuana está prohibido pero se a policía te colle cunha china axiña te solta, mentres que en Panamá se te arrestan cunha mínima pinga de produto estás seis meses á sombra, mentres que o maltrato a animais, neste caso, galos de pelexa, é tratado en Panamá con aquiescencia e con repudio no seu país veciño. Sabemos que un dos puntos fortes deste país está basado na conciencia e no respeto pola natureza e ao medio ambiente que se nun principio era fonte de biodiversidade agora tamén é o motor máis potente da economía.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.