tortuguero (III)

26.05.07 @ 02:11:08. Archivado en textos creativos

A calor obstinada roíanos os ósos. Os rapaces xogaban no medio dos camiños, nin un só coche, como moito bicicletas; nenos en bicicletas disfrutando da tarde que se estructuraba en camiños ou rúas vexetais e nas súas orelas negocios onde se ofertaban detalles que tivesen que ver coa lembranza do lugar; algunha tenda pequena; casas e máis casas labradas por esa humildade da madeira vella; palmeiras; cocos; formigas levando follas nas súas costas, as mínimas, facendo control de calidade; as erbas que lle chaman adormideiras, que co rozamento sobre as súas follas se fechan, como dicindo, non permito que ninguén ouse tocarme, e de feito, se as inxires, producen un efecto alucinóxeno similar ao consumo dalgún tipo de setas ou doutras drogas.
As formigas soldado tamén apareceron na tarde, despois de ser molestadas no formigueiro, formigas que teñen unha forza incrible nas súas mandíbulas e que están destinadas a protexer o seu territorio. Tamén vimos un video nun local do centro de recuperación das tartarugas, onde se explicaba cómo se organizaron as actividades de protección e cómo con grande esforzo xurdiu no lugar unha conciencia conservacionista do animal e do medio ambiente. De feito, Tortuguero significa cazador de tartarugas, especialmente coñecido por ser un espazo típico e habitual de caza. Agora esta actividade está prohibida, aínda así a primeira causa de morte segue a ser o home, xa que, de xeito ilegal, sempre hai quen busque os seus niños para recoller os ovos ou lle dea morte á tartaruga para usar a súa carne e cuncha. Unha das consecuencias importantes da instalación na zona da Caribbean Conservation Corporation foi a muda das mentalidades: non só se trata de evitar que a tartaruga desapareza do planeta, senón tamén de dotar á xente dun medio de vida cambiando os hábitos, é dicir, antes a morte da tartaruga proporcionaba alimento, agora a conservación da tartaruga produce os ingresos suficientes para vivir, porque os turistas van a Tortuguero para observalas no seu hábitat, asistindo ao escenario que durante millóns de anos se repite, o animal emerxendo das aguas, entrando lenta no areeiro da praia, buscando un lugar para desovar, entrar en trance e repetir o ciclo que posibilita a súa reproducción e pervivencia. Antes de que se producise esta transformación o nome de Tortuguero estaba vinculado non só á morte senón tamén á industria madereira, constátano todos os instrumentos que permanecen oxidados á beira do embarcadoiro, como testemuña de que ao redor de trinta anos atrás se practicaba a tala indiscriminada de árbores que transportaban cara ao lugar de transformación a través do río. Todo o bosque primario, agás dúas especies arbóreas de madeira moi pesada e non navegable, se extinguiu. A especulación destruiu Tortuguero que só puido recuperarse a partir da creación do movemento en prol da defensa da tartaruga, e os incribles bosques secundarios comezaron a medrar.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.