Antonio Piñeiro
autor
Contacto
Ourense, parada e fonda
10.02.07 @ 11:32:01. Archivado en Sobre el autor
Hai xa uns cantos anos, propuxéronme colaborar na elaboración dunha guía de recursos turísticos da provincia de Ourense.Despois de ter mantido algunha reunión para consensuar criterios e por en común as liñas argumentais da publicación, cando fixen a proposta -que aínda debo ter gardada na memoria desordeada do meu ordenador- propuxen que o lema debería ser: Ourense, parada e fonda. Logo, por cuestións que se me escapan, o traballo non coallou e a publicación que saíu á rúa foi un catálogo por comarcas de itinerario -pois non eran comarcas naturais- dos principais recursos históricos, culturais, patrimoniais, festivos, naturais da provincia, que en todo caso cumpriu o seu ciclo informativo naquel intre. A miña proposta tiña explicación en que, alén doutros eslogans máis turísticos ou comerciais que se poideran crear, eu cría que o obxectivo que había que marcarse, antes que ningún outro, era conseguir facer parar a aqueles milleiros de potenciais visitantes que cruzaban de norte a sur e de leste a oeste -e viceversa- a nosa provincia ó longo de todo o ano, xa fora para viaxar a Portugal ou cara as Rías Altas, xa para ir cara Castela ou as Rías Baixas, no segundo, para que fixesen parada e fonda nalgún lugar da provincia, aproveitando non só tódolos recursos que xenericamente acabo de enumerar, senón tamén os saborosos recursos gastronómicos cos que por fortuna tamén contamos. Non se deron pasos por esa vía naqueles intres, pero déronse pasos, en todo caso, un pouco renqueantes nos primeiros tempos e decididos despois, dende que o actual xerente do Patronato de Turismo decidiu que os recursos turísticos ourensáns eran un producto máis no entramado socio-económico da provincia -un producto como pode ser o viño, a pizarra, as castañas ou a enerxía potencial da auga- e se puxo a traballar en colocalo no mercado da forma máis atractiva posible e coa máis productiva das posibles fórumulas de comercialización. Froito dese traballo -a miúdo máis solitario do que a empresa merece- o turismo ourensán ten acadado algúns éxitos que eu hoxe quero simbolizar na reproducción da estación de Baños de Molgas e na representación de seu xefe de estación, Moncho Borrajo, estes días en Fitur. É evidente que Ourense está por descubrir polo turismo español. Coloquémonos, pois, dunha vez, todos na mesma estación e propoñámonos facer que a xente pare. Eles descubrirán Ourense e nós, que aínda estamos a tempo malia que teñamos perdido moito en obtusas e valeiras divagacións.
Dirección para hacer trackback a este post:
http://blogs.periodistadigital.com/btbf/trackback.php/73688
Comparte esta información
Comentarios, Trackbacks, Pingbacks:
Aún no hay Comentarios/Trackbacks/Pingbacks para este post...
Se muestran únicamente los últimos 40 comentarios de cada post.
