Unha hora máis

12.12.06 @ 01:06:21. Archivado en Sobre el autor

A proposta seica foi presentada por un representante ourensán e aínda que disque xa fora debatida no consello comarcal desta cidade e recollida naquel momento por este mesmo xornal, a verdade é que me pasou desapercibida.
Disponse agora, o BNG -unha vez aprobada no seu congreso por ampla maioría-, trasladala ós foros institucionais para ver qué visos pode ter para facerse real.
Eu non sei se o noso conveciño tiña idea da revoeira que ía levantar con esta iniciativa, ó ser considerada polos seus representantes orgánicos, pois se ben o asunto adoita formar parte das conversas de taberna cada vez que chega o outono e a primavera e nos mandan rolar para adiante ou atrás as agullas dos reloxios, a verdade é que ata o de agora xamais tiña superado o campo da especulación oral. Se cadra por iso ata se fixeron eco dela as emisoras de radio e as canles de televisión de audiencia estatal.
Eu confeso que non é a primeira vez que penso nela e incluso creo que dende a óptica da teoría comparativa e dende a perspectiva meramente astral, ata pode ter algunha lóxica, pois ninguén pode discutir que o sol rompe unha hora antes en Lloret de Mar ca en Fisterra e cando se pon nas Rías Baixas xa leva unha hora durmindo na Costa do Azahar.
Ora ben, se temos en conta outras circunstancias que falan do funcionamento coordinado dun Estado, cabe preguntarse: ¿Abonda esta evidencia para levala adiante ou haberá que valorar outros pros e contras denantes de porse a falar disto noutro sitio que non sexa ó pé da barra dun bar?
Sinceiramente, querido lector, póñase a pensar niso...
En canto, eu continúo a preguntar: ¿Cal é o sentido da proposta? ¿O meramente racional ou físico, ou aquel que aniña no vello mito da simboloxía diferencial?
E aínda máis: ¿É xeógrafo ou economista, o asinante da proposta? ¿Foi avalada, esta, por algún estudio relativo ós efectos sobre a saúde ou o peto dos galegos, ou é tan só o traslado dunha teima que agora a formación política deberá asentar en análises máis ou menos concienzudas de profesores da Universidade?
Como pode ver, querido lector, nin estou a favor nin en contra da medida... Ora ben, se a proposta ten só como alicerce o simbolismo diferencial, entón eu pediría que no canto dunha hora menos, simbolicamente reivindicaramos todos xuntos unha hora máis. Pois para seguir andando por detrás do resto do Estado xa abonda con que anden os nosos salarios, a sanidade, as infraestructuras, a agricultura, o emprego o AVE e non sei cantas cousas máis.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.