¿É Quintana un rexionalista?

15.11.06 @ 09:26:24. Archivado en Sobre el autor

Leo na prensa de onte que o ex-lider de Unidade Galega e noutra e agora rival do actual vicepresidente da Xunta ó posto de voceiro nacional do BNG, acusa ó ex-alcalde de Allariz de facer política rexionalista dende o seu cargo institucional.
En base a esta aseveración e na liña dos inquéritos formulados a min mesmo o pasado sábado, pregúntome eu, entón. ¿É realmente Quintana un político rexionalista? Ou, nun contexto político máis amplo: ¿É rexionalista a dirección actual do BNG?
A verdade é que a bote pronto, calquera que lea a prensa diaria e escoite diariamente as súas declaracións, respondería abertamente que non. Ora ben, visto probablemente con máis elementos de xuízo e con abondosos datos internos, que eu non teño e que loxicamente deben ter tanto Camilo Nogueira coma Alberte Rodríguez Feixóo, a resposta pode mudar dun xeito radical.
De calquera xeito, sexa rexionalista ou non, sexa ou non nacionalista fetén, ou practique ou non unha política nacionalista de esquerdas; o que si evidencia esta manifestación do vello ex-europarlamentario, é que existe un profundo debate interno -lóxico, por outra banda, xa que o poder muda sempre as perspectivas- sobre a orientación que debe tomar cara o futuro unha formación moito máis complexa ca un partido político pola súa non menos complexa estructura de organización.
O fácil sería, pois, responder de súpeto que non. Aínda que, se a contestación non sae do pensamento de contado e un para a pensar un minuto, a cousa muda de condición. Pero non porque a resposta deba ser afirmativa, que non o creo. Senón porque se cadra o que tiña que formular Camilo Nogueira era outro tipo de cuestión que non ten tanto que ver cos distintos “galóns” de nacionalismo, galeguismo ou rexionalismo, senón co liberal-posibilismo fronte a un esquerdismo teórico que abofé practicarían con máis nidieza Camilo Nogueira ou Beiras.
E digo isto porque, máis ca un posible rexionalismo, o que Camilo Nogueira non di, pero deixa entrever, suxíreme a min unha pregunta ben diferente: ¿É, o actual vicepresidente, un nacionalista de esquerdas ou un galeguista de centro?. Ou, mellor dito: ¿Están practicando, os conseleiros do BNG, unha política nacionalista de esquerdas ou unha política galeguista de centro?
Polo de agora non son quen de responder, pero, por aí e non por outras corredoiras, é por onde penso que cantan os eixos dos carros do debate interno do BNG.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.