¿Necesita Galicia "Ciutadáns"?

10.11.06 @ 23:49:33. Archivado en Sobre el autor

Logo do éxito acadado -e falo de éxito porque non é normal que unha forza política acade 3 parlamentarios tan pronto acaba de nacer- por ese movemento cívico xerado arredor do fastío “hipernacional” que nos últimos anos veñen sentindo en carne propia moitos cataláns, leo que nalgúns sitios xa están a pensar en “exportar” o experimento a outras Comunidades do Estado.
Un deses lugares, polo que acabo de ver na rede, é Madrid. Entón éu pregúntome, ¿para que queren un movemento coma “Ciutadans” na vila e corte se o único nacionalismo que se respira é o que mistura coa contaminación medio ambiental a “Faes”.
O outro lugar disque é Galicia porque, polo visto, o actual secretario xeral da nova formación parlamentaria catalana é un xornalista que se fixo como tal en Ourense.
E perante esta especulación, eu pregúntome tamén ¿Necesita Galicia -ou a política galega- un movemento semellante ó de Ciutadans de Cataluña?
Evidentemente a resposta é inmediata e rotunda: Non. E digo que non porque afortunadamente aquí aínda non se dan -e é de agardar que tarden moito e se daren- as condicións institucionais ou as circunstancias socias para que se teña que abonar un saíncho semellante.
¿Que necesita, pois, a política galega, que non sexa ese movemento social?
Pois, ó meu humilde ver, unha forza política que tivemos na “Alba de groria” que ensalzou Castelao; que en versión menos teoricista foi quen de renacer con máis forza aínda cós Ciutadans de Cataluña cando se presentou por vez primeira ó Parlamento Galego, xa que logo empezou a súa andaina con 11 representantes, nada máis e nada menos, e que empezou a esmorecer cando morreu Franqueira.
¿E por qué non nace unha forza deste tipo? habería que preguntarse tamén.
Pois, ó meu humilde ver, porque os que o podían facer téñenlle medo ó frío que pode facer na travesía e que a travesía os afaste para sempre do poder.
¿Pero hai electorado para elo?
Pois, ó meu humilde ver, penso sinceiramente que si. Penso que no medio da bahía boga unha inmensa bancada electoral que sería capaz de convivir en harmonía con esa ala, digamos galeguista, do Partido Popular e ó mesmo tempo sería quen de convivir sen estridencias cos herdeiros de Rodríguez Peña e algúns outros do BNG, non en van xa compartiron proxecto cando a piña era algo máis có fruto do piñeiro na Galicia do abrente finisecular.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.