Productos galegos en NY

04.11.06 @ 11:51:29. Archivado en Sobre el autor

Acabo de escoitar na radio unha entrevista co director xeral de Turismo falando dunha loubable campaña promocional que a partir do próximo luns levarán a cabo as Consellerías de Pesca, de Medio Rural e de Industria, sobre a gastronomía galega no edificio neoyorkino das Nacións Unidas.
Falaba o director xeral -e logo refrendeino na páxina oficial- da presencia de dez reputados cociñeiros galegos durante unha ducia de días nos fogóns da ONU co fin de lle daren de comer diariamente a 400 ”diplomáticos, xornalistas e operadores turísticos” de moi diversos países, e deste xeito meterlle o gusto no corpo con productos galegos e promover, con elo, non só que Galicia se converta nun punto de referencia para eles, senón que eles mesmos se transformen en divulgadores universais das excelencias gastronómicas e polo tanto turísticas desta terra coa que calquera neoyorkino se encontraría se decidise botarse a nadar -e tivese reservas dabondo para elo- dende o peirao da Estatua da Liberdade, en liña recta cara onde nace o sol tódalas mañás en Manhatthan, cunha lixeira derivación norteña.
Falou o director xeral destes e outros pormenores e a min viñéronseme á idea por segunda vez as fachadas de restaurantes como o “Toledo” -cuxo propietario anda precisamente estes días por Celanova- que toma a sombra do Empire State Building; o “Sevilla” cuxos camareiros saben ben o que é servirlle un albariño ó ”stone” Mike Jagger e a outras moitas rutilantes estrelas internacionais do cinema; o “Spain” que antes de restaurante foi a primeira sala de exposicións na que expuso un artista negro en Nueva York, e outros moitos nomes que agora non repito pero que se contan por ducias e que, coma o “Faro” -se cadra o máis antigo deles-, levan décadas sendo verdadeiros embaixadores de Galicia nas mesmas rúas polas que corre en fervenza insaciable o verde sangue económico do mundo.
E viñeronseme novamente á idea por dúas razóns. A primeira, porque novamente a Xunta de Galicia, obviando a súa presencia alí, volve ningunear o potencial que pode ter a diáspora para darlle a coñecer ó mundo a nosa terra. E a segunda porque se alguén debería viaxar alí, ese debería ser o director xeral de Comercio, xa que logo, cando lles preguntas a estes profesionais galegos da restauración “manhatteña” por qué non levan máis productos galegos para alí, a voz de todos soa unha para se queixar do complexo que é, e, sobre todo, do difícil que lles resulta conseguir que lles sirvan as cantidades que rentabilizan o desprazamento.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.