Platero

10.10.06 @ 10:38:06. Archivado en Sobre el autor

Por cuestións derivadas das Casas Museo e Fundacións de Escritores, ando estes días pola ruta da Luz e do Descubrimento, aí onde Iberia debuxa un recanto artificial entre Faro e Ayamonte, as terras de Huelva, para máis señas.
Por terras onde o influxo de Juan Ramón é tan omnipresente que hai uns anos non había máis ca tres burros en Moguer e nestes intres -segundo me comentou o propietario dun deles-, superan o cento, xirando todos eles darredor -coma se dunha noria se tratase- do influxo literario de Platero, o gran protagonista, despois do seu autor, do vivir diario de homes e nenos, de novos e vellos, de nativos, adoptados e estranxeiros que habitan a ribeira sur do Río Tinto.
Neste marco natural, cultural e literario, unha das actividades que tiven o privilexio de testemuñar tivo l ugar en Fuentepina, baixo o piñeiro onde o premio Nobel decidiu soterrar literariamente ó máis famoso xuvenco da literatura, se cadra universal.
E digo que tiven o privilexio, porque aínda sen entendelo, poidemos escoitar cómo soaban pasaxes do compendio literario en rumano, alemán, xaponés, guaraní, galego, catalán e portugués, facendo un sinxelo exercicio literario universal á altura da propia universalidade deste andaluz universal.
No caso galego, o encargado de ler a pasaxe foi o catedrático e traductor da Terra Chá, Xesús Rábade Paredes, quen elexiu con intención o capítulo XVII do libro, aquel no que baixo o título El niño tonto (O neno parvo), Juan Ramón Jiménez fai referencia ó poema Ai, de Curros Eníquez, onde o poeta de Celanova se laia poéticamente da morte do seu fillo.Foi unha fermosa lectura, a de Rábade Paredes, que está chamada a fornecer, en forma de manuscrito, á Casa dos Poetas para axudar a fornecer un arquivo ata o de agora exiguo, pero cunhas expectativas inmellorables no futuro ó que se enfronta a casa da Calle Arriba de Celanova.
Foi unha fermosa lectura que me fixo sentirme orgulloso dunha terra e dunha lingua no marco dunha Iberia universal.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.