Matrimonios de conveniencia

04.07.06 @ 00:16:28. Archivado en Sobre el autor

Abro o xornal e leo que a aprobacion dunha moción dun concelleiro do BNG, apoiada polo grupo municipal do PP nun dos concellos máis grandes da provincia, suspende as asignacións orzamentarias que posibilitan o pago da mesada ó alcalde do PSOE.
Uns días antes abro o xornal e leo que o grupo municipal do PSOE noutro dos concellos de referencia en Ourense, vota co PP outra moción para botar abaixo unha iniciativa do BNG. E non só iso, senón que aqueles dous grupos políticos -que son goberno con alcaldía e oposición- están a favor dunha iniciativa lúdico-festiva para a terceira idade, que leva media vida organizándose co mesmo formato e que agora o BNG -que cogoberna co PSOE- quere mudar con outro nome.
Días despois abro o xornal e tamén en letra de gran formato leo un titular que di que o alcalde do PSOE doutra vila histórica da provincia expulsa ó voceiro do BNG -teniente de alcalde dese mesmo goberno- dun pleno por insultar ó voceiro do PP. E non só iso, senón ó día seguinte tamén leo unhas queixas do devandito voceiro expulsado laiándose de que o alcalde o ten marxinado.
Chegado aquí miro o calendario e decátome de que estamos no mes de xullo e que hai pouco máis dun mes que empezou a conta atrás para as eleccións municipais do 2007.
Evidentemente, sen vivir o día a día -que é a única forma de coñecer a letra pequena de todos estes conflictos- non son quen de adiviñar se o feito de que se produzan estas tres discordias entre representantes dos dous partidos que sosteñen o goberno galego e que ata hai pouco se entendían tamén nos respectivos concellos, ten algo que ver co achegamento paulatino dese tempo de recolleita onde cada quen debe tratar de que caian na súa rede o meirande número de cereixas.
Certamente é moi posible que nada teñan que ver unhas liortas con outras, pois tanto para o ben como para o mal todos sabemos que os concellos teñen -por lei- vida propia, que empeza e remata xusto onde o cartel identificativo anuncia a mudanza da toponimia.
Sen embargo, teñan ou non razón de ser nese complexo equilibrio de fíos e nese silencio contido no que se mantén o goberno galego, a un -que non é elector en ningún deses tres concellos, pero si nas eleccións que quitan ou poñen goberno galego- cántalle todo iso e pensa en cercanas lexislacións como a portuguesa onde a elección do alcalde é exercida de forma directa entre o elector e os candidatos, fuxindo con moita lóxica da extravagancia dos matrimonios de conveniencia.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.