"Pr'agora vale ben"

10.06.06 @ 15:53:55. Archivado en Sobre el autor

Esta semana tódolos medios de comunicación galegos divulgaron con grande apoio gráfico unha iniciativa avalada pola Consellería de Industria e proposta por un estudio -é de supor, vangardista- de arquitectura de Santiago, chamado, seica, a ofrecer solucións maxinativas para paliar os actuais déficits de vivenda a custe asequible para os novos e os que xa non somos tan novos.
Dicía o conselleiro, con tal motivo -máis no ámbito da política de presentación de innovadores desexos, ca no eido da política das realidades que precisa esta terra-, dicía, repito, o conselleiro de Industria, que “o proxecto Novos Espazos Habitables sitúa a Galicia na vangarda da investigación en novas tecnoloxías aplicadas á construcción”.
E o proxecto, que foi feito realidade polo devandito estudio de arquitectura compostelano co apoio económico da propia Xunta para acoller nel o denominado Centro Tecnolóxico Rural, non é outro có que sae do resultado de montar unha especie de “lego” ou “exin castelos” cos contedores normalizados que usa a marina mercante para transportar polo mundo adiante a práctica totalidade de productos internacionais que consumimos a cotío.
Eu, cando vin a foto e lin o titular, non puiden menos ca pensar nun sinfín de imaxes a miúdo estrambóticas que durante os últimos anos teñen publicado os xornais galegos baixo o desgraciado epígrafe de “feísmo” -contra o que paradoxalmente leva anos loitando con uñllas e dentes a súa colega de partido e compañeira de goberno, a conselleira de vivenda-, así coma noutras estampas máis cercanas coas que me cruzo por campos e vereas, estradas e corredoiras desta provincia cada día que saio a “camiñar”.
É dicir, a idea que propón a Consellería de Industria e Innovación para solucionar o problema da carestía da vivenda de Galicia, co marchamo futurista de ”I+D+i”, resulta que hai décadas que ten sido inventado por labregos e non labregos, xentes de aldea e traballadores de cidades, pescadores e veciños de arrabaldos da Galicia que vai dende o cumio de Santa Tecla á foz do río Eo e dende o tunel do Padornelo ata a punta do Roncudo, pasando por calquera das máis de 30 mil aldeas sementadas polo aquén e polo alén.
Se clonar a instalación do carromato dun camión frigorífico nunha leira -como vexo eu cada día nunha estrada calquera de Ourense- é “I+D+i”, entón o “pr’agroa vale ben” é a formula máxica coa que Galicia leva décadas instalada no futuro da construcción civil.

Comentarios:

Se muestran únicamente los últimos 40 comentarios de cada post.

Los comentarios para este post están cerrados.