Borja Verea
autor
Contacto
177 € por veciño
28.02.09 @ 17:49:52. Archivado en Política, Xornal de Galicia
Publicado en Xornal de Galicia el viernes 27 de febrero de 2009
Diante dun agasallo non deberiamos esmiolar o enxeño senón gozar. As axudas ao investimento nos concellos suporán un gasto de 177 € por veciño, así que neste caso unha análise do agasallo non será reflexo da mala educación senón do desexo do bo destino destes cartos. E para sabermos se estes terán unha boa evolución o primeiro é debullar cales son os fins pretendidos.
Os obxectivos que din se queren acadar (e publicados no BOE) con estes 8.000 millóns son: a dinamización a curto prazo da actividade económica, a creación de emprego e a capitalización dos municipios.
¿Ímolo conseguir?
No primeiro obxectivo a pregunta que nos facemos é que actividade económica se quere dinamizar e a resposta está no propio Decreto 9/2008: “a mobilización dos excedentes do axuste da construción” e “a viabilidade de pequenas e medianas empresas relacionadas coa construción”. Non hai dúbida que é unha boa idea utilizar os concellos para chegar a estas empresas intermedias xa que son estes os que habitualmente contratan con elas, porén non parece moi sensato unha política activa tan intensa para alongar un modelo produtivo que está esgotado. Ademais, e como exemplo, ¿ que pasará coas empresas que non estean no “circuito municipal”?
O segundo obxectivo é a creación de emprego. Aquí, e despois da análise das solicitudes de cada concello, espérase a contratación de 278.518 traballos directos. Nestas solicitudes os concellos debían propoñer unha estimación de persoas que se ocuparán, sen máis aclaracións. E claro, as cuestións xorden, un exemplo: para un investimento de dous meses, ¿colocamos 3 traballadores durante os dous meses ou 24 traballadores con contratos dunha semana cada un?. Por outro lado aos adxudicatarios esixiráselles nos contratos que cumpran estes requisitos de ocupar persoas desempregadas, incluso con penalizacións no caso de incumprimento, pero será moi difícil controlar que non boten á rúa ao seu persoal habitual para poder cumprir estas esixencias.
O terceiro obxetivo declarado no Decreto 9/2008 é a capitalización dos concellos. Paréceme a liña máis interesante. Unha aposta importante e un xesto de confianza nos poderes locais. Aínda que non deixa de ser unha subvención dirixida, a cantidade desta e a marxe que outorga (non hai noticia de que rexeitaran propostas) case que permite falar dun novo orzamento de investimentos.
Nas vindeiras datas rematará a publicación dos proxectos aprobados e será sen dúbida o momento para medir que xestores temos, que ideas propuxeron e que actuacións esqueceron. Será tamén unha ocasión máis para a práctica nacional de “xogar a alcalde” co agora si incorruptible “eu faría”. En definitiva, a análise das propostas dos nosos concellos suporá unha reválida popular con avaliación inmediata.
Dirección para hacer trackback a este post:
http://blogs.periodistadigital.com/btbf/trackback.php/220945
Comparte esta información
Comentarios, Trackbacks, Pingbacks:
Aún no hay Comentarios/Trackbacks/Pingbacks para este post...
Se muestran únicamente los últimos 40 comentarios de cada post.
